Lars Nyre er professor i medievitskap ved Institutt for informasjons- og medievitskap ved Universitetet i Bergen. Han underviser i medie- og interaksjonsdesign i Media City Bergen og er leiar for det HK-dir-finansierte prosjektet TekLab (2021 – 2024). Her utforskar faglærarar og studentar pedagogiske metodar for å undervisa i ny teknologi i skuleverket og universitetssektoren. TekLab-prosjektet vert avslutta ved utløpet av 2024, og fagmiljøet er i ferd med å dra konklusjonar. Vi ser at elevar treng både teoretisk og praktisk trening i å forstå kreftene som formar kunstig intelligens-teknologi. I foredraget fortel Lars Nyre om TekLabs praktiske utforsking av kunstig intelligens med elevar og studentar. Tilnærminga legg særleg vekt på det som blir kalla verdiforslag, og utforskar ulike samfunnsverdiar med prototyping, pitching og publisering av løysingsforslag. Vi meiner at elevar og studentar må meistra både design og entreprenørskap for å kunna håndtera teknologiutviklinga i samfunnet, og vi samlar dei nødvendige ferdigheitene i begrepet innovasjonskompetanse.
