Trass i at vi ser statsministeren og statsrådane kvar einaste dag, er det eit lite mysterium korleis regjeringsmakta verkeleg fungerer, og korleis makta vert overført frå den eine regjeringa til den neste. Det finst overraskande lite av formelle reglar som regulerer korleis sentralleddet i den utøvande makta skal arbeide, og reglane som finst, kan føre oss på villspor. Les vi Grunnlova, får vi inntrykk av at kongen sjølv har den eigentlege makta, medan politikarane må nøye seg med å gje majesteten råd. Dette føredraget tek sikte på å fjerne noko av mystikken rundt regjeringsmakta, ved å vise nokre hovudtrekk i historia til statsmakta frå 1814 og fram til i dag.
